BO
Eer aan God
Ons eerste en belangrikste fokus is bo: ons wil tot eer van die Here leef. Die Here het ons geskep om Hom te ken, lief te hê en te dien. Daarom wil ons as gemeente voortdurend groei in ons kennis van God en in ons toewyding aan Hom.
Die Here Jesus leer dat die grootste gebod is om die Here lief te hê met ons hele hart, siel en verstand (Matteus 22:37). Hierdie liefde vir God word versterk deur ons kennis van sy Woord en deur gebed. Daarom wil ons ’n gemeente wees waar die Bybel sentraal staan in prediking, onderrig en persoonlike geloofslewe.
Die Here sê tog duidelik in sy woord in Romeine 10:17: “Die geloof kom dus deur die
prediking wat ’n mens hoor, en die prediking wat ons hoor, is die verkondiging van
Christus.” Daarom wil ons mekaar aanmoedig om in die Here te groei deur gereelde erediens bywoning, Bybelstudie en gebed.
Ons begeerte is dat ons almal meer sal leef tot eer van God, want ons is tot sy eer geskep
(1 Korintiërs 10:31).
God is die enigste ware God, daar is nie nog een soos Hy nie. Hy is ’n geestelike wese wat ons nie kan sien nie, maar wat werklik en lewend is. Hy was nog altyd daar en sal altyd daar wees. Ons kan Hom nooit volledig verstaan nie, want Hy is oneindig groter as ons. Hy verander nie, Hy is almagtig, volkome wys, regverdig en goed, die bron van alles wat werklik goed is.
Hy is een in wese, maar bestaan van ewigheid af in drie Persone: die Vader, die Seun en die Heilige Gees. Hulle is nie drie gode nie, maar Een God.
Die Vader is die oorsprong van alles wat bestaan. Die Seun is die Woord en die volmaakte beeld van die Vader, Hy wys vir ons presies wie God is. Die Heilige Gees is die Gees wat uitgaan vanaf die Vader en die Seun. Hy is die Derde Persoon in die Drie-eenheid. Hy werk in ons.
Die drie Persone is werklik onderskeie, die Vader is nie die Seun nie, en die Seun is nie die Gees nie, maar hulle is ook nie geskei nie. Hulle is volkome een: dieselfde God, dieselfde mag, dieselfde goedheid, dieselfde heerlikheid.
Nog altyd was God só, Vader, Seun en Heilige Gees saam, sonder begin en sonder einde.
Wie is God
Apostoliese Geloofbelydenis
Ek glo in God die Vader, die Almagtige,
die Skepper van die hemel en die aarde.
En in Jesus Christus, sy eniggebore Seun, ons Here;
wat ontvang is van die Heilige Gees, gebore is uit die maagd Maria;
wat gely het onder Pontius Pilatus, gekruisig is, gesterf het en begrawe is en ter helle neergedaal het;
wat op die derde dag weer opgestaan het uit die dode;
wat opgevaar het na die hemel en sit aan die regterhand van God, die almagtige Vader, van waar Hy sal kom om te oordeel die wat nog lewe en die wat reeds gesterf het.
Ek glo in die Heilige Gees.
Ek glo aan ʼn heilige, algemene Christelike kerk,
die gemeenskap van die heiliges;
die vergewing van sondes;
die opstanding van die vlees
en ʼn ewige lewe.
Nuutste Preke
Psalm 77 In hierdie Psalm verteenwoordig die Psalmdigter die volk. Hy praat namens hulle. Elkeen van hulle het nagte wakker gelê en worstel oor alles wat om hulle aan die gang was. Hulle het nie verstaan wat gebeur het nie. Hoe meer die volk oor die Here dink, hoe meer raak hulle onrustig. Hulle worstel nagte om met al die vrae.
Jona 4 Sien, die boek gaan oor die HÉRE. Die boek kon net hier, na hoofstuk 3, gestop het, want Nineve kom tot bekering. Dit wys na Pinkster en wys na iets wat gaan ingryp buite God se verbondsvolk. Álmal in Nineve het geglo! Hier kon dit net eindig met ‘amen!’ Maar dan gee die Here die gebeure van Jona 4.
